Janmbhoomi

Janmbhoomi

godi mein teri pala bada
naam tera meri jaati hai
teri nadiyan sakhiyan meri
tera aagan hi saathi hai
apni pushp lataon se har
bachpan tu mehkaati hai
phir aaj jab chhaya dukh ka baadal
kaise nishthur reh paati hai

dekh meri aakhon ka aansoon,
tu phoot phoot ke ro na saki,
tujhe kaise keh doon maa

jab jab nikat dikhi safalta
kuchh ghatna ghat jaati hai
kuchh saajish kuchh ranjish aisi
ki haar hi bas mil paati hai
khushi sage bhai ki aksar
kyun bhai ko tadpati hai
phenk mujhe hi peechhe kyun
kaum aage aana chahti hai

apni hi santanon ke beech
tu beej prem ke bo na saki
tujhe kaise keh doon maa

chala aaya mein door desh me
ab aur sahi nahi jaati hai
par door hua hoon jabse
yaad teri hi satati hai
dagmag meri jeevan naiya
ek saaya teri chhati hai
laut tere paas aana chaahon
vaapas kyun na bulati hai

jaan mera nit akelapan
tu meri hokar bhi ho na saki
tujhe kaise keh doon maa

See the followup in Bhoomiputra